Kraftsituasjonen veke 20, 2024
Mykje tilsig og lågare kraftprisar
Snøsmelting grunna varmare vêr over heile Noreg gav mykje tilsig til vassmagasina førre veke. Det høge tilsiget bidrog til ein auke i magasinfyllinga på 8 prosenteiningar. Fyllingsgraden i Noreg er no nesten 40 prosent, som er over medianen på denne tida av året.
Mykje tilsig gav høg produksjon frå uregulerbar vasskraft i Noreg. Saman med lågare forbruk bidrog dette til at kraftprisane gjekk ned i alle dei norske prisområda og vart omtrent halvert samanlikna med veka før. I sørlege Noreg (NO1, NO2 og NO5) varierte vekeprisen mellom 24 og 28 øre/kWh. I Midt- og Nord-Noreg (NO3 og NO4) var vekeprisen 14 øre/kWh. Stort kraftoverskot og låge prisar i Nord-Sverige (SE1 og SE2) gav høg import til Midt- og Nord-Noreg. Ikkje sidan veke 5 har det vore høgare nettoimport av kraft til områda nord i Noreg.
Sjølv om det var ein kraftig auke i vindkraftproduksjonen i Danmark, gjekk den samla produksjonen i Norden ned. Til tross for dette auka nettoeksporten ut av Norden. Dette skuldast at nedgangen i forbruket var større enn nedgangen i produksjonen. Periodevise flaskehalsar til kontinentet bidrog til at prisane i Norden var lågare enn på kontinentet.
Last ned kraftsituasjonsrapporten for veke 20 2024.
Vassmagasinstatistikk
Les meir om vassmagasinstatistikk her.
For fleire detaljer, sjå: www.senorge.no/map.
Data for kraftsituasjonen
NVE lanserer no den første versjonen av «Data for kraftsituasjonen». Denne nettsida vil presentere utvalde data som blir brukt i kraftsituasjonsrapportar. Nettsida er interaktiv, og brukarar vil ha moglegheita til å tilpasse parametrar som område og tidsperiode. Vi tek gjerne imot tilbakemeldingar som kan bidra til å forbetre rapporten.
