Kraftsituasjonen veke 38, 2021
Reduksjon i kraftprisane
Kraftprisane var lågare i store delar av Europa i veke 38 samanlikna med veka før. Likevel var den gjennomsnittlege kraftprisen sør i Noreg (NO1, NO2, NO5) framleis over 1 kr/kWh. Auke i vindkraftproduksjonen i Norden og nord på kontinentet bidrog til prisnedgangen. Samtidig var vasskraftproduksjonen i Noreg lågare enn veka før. Nord-Noreg (NO4) hadde framleis den lågaste kraftprisen i Norden, på 51 øre/kWh i gjennomsnitt førre veke.
På torsdag var det mykje vind og svært låge kraftprisar i mellom anna Tyskland. Grunna vedlikehaldsarbeid på mellomlandsforbindinga mellom Noreg og Tyskland (NordLink), var det ingen tilgjengeleg kapasitet til å importere billig kraft frå Tyskland i desse timane. Trass import på forbindingane til Nederland og Danmark hadde sørlege Noreg høgare gjennomsnittleg kraftpris enn fleire land nord på kontinentet på torsdagen.
