Kraftsituasjonen veke 45, 2026

Låg vindkraftproduksjon for årstida og auka kraftforbruk frå veka før bidrog til eit stabilt høgt prisnivå på kontinentet førre veke. Dette, saman med auka forbruk i Noreg, bidrog til høge kraftprisar og auka vasskraftproduksjon i sørlege Noreg (NO1, NO2 og NO5). Høg vindkraftproduksjon nord i Norden bidrog til tilnærma uendra kraftprisar i Midt- og Nord-Noreg (NO3 og NO4). I sørlege Noreg bidrog auka vasskraftproduksjon og lite tilsig til at magasinfyllinga gjekk ned frå veka før.

Auka kraftprisar
Vekesnittet for kraftprisane i sørlege Noreg var det høgaste sidan slutten av 2022, men framleis lågare enn på kontinentet. Til dømes hadde Tyskland eit vekesnitt på 268 øre/kWh, 50-80 øre/kWh høgare enn i sørlege Noreg. Lite vindkraftproduksjon og auka forbruk gjennom veka bidrog til det høge prisnivået på kontinentet. I periodar med låg vindkraftproduksjon og høgt forbruk blir dyrare kraftproduksjon oftare prissetjande på kontinentet. Gjennom mellomlandsforbindelsane bidreg dette til eit høgare prisnivå også i Noreg, særleg i sørlege Noreg.

I Midt- og Nord-Norge var det lite endring i prisane frå veka før. Årsakene var blant anna godt med vindkraftproduksjon nord i Norden (NO3, NO4, SE1, SE2 og FI) og flaskehalsar mellom nord og sør i Norden. Nord-Noreg har framleis dei lågaste kraftprisane i Noreg, mens Midt-Noreg igjen hadde ein vekepris på over 100 øre/kWh.

Kraftprisar (gjennomsnitt for veka):

• Søraust-Noreg (NO1): 189 øre/kWh (+37 øre/kWh frå veke 44)
• Sørvest-Noreg (NO2): 217 øre/kWh (+51 øre/kWh frå veke 44)
• Midt-Noreg (NO3): 101 øre/kWh (+2 øre/kWh frå veke 44)
• Nord-Noreg (NO4): 19 øre/kWh (-3 øre/kWh frå veke 44)
• Vest-Noreg (NO5): 190 øre/kWh (+45 øre/kWh frå veke 44)

Auka forbruk og redusert magasinfylling i sørlege Noreg
Førre veke var prega av eit vêrskifte i Noreg med lågare temperaturar og høgare forbruk samanlikna med veka før. Samen med eit høgt prisnivå på kontinentet bidrog dette til auka vasskraftproduksjon med magasin i sørlege Noreg. Kraftprisane førre veke var høgare enn det marknadene ventar til vinteren. Dette bidrog til at fleire vasskraftprodusentar valde å bruke vatn no, som elles kunne vore spart til vinteren. Sist kraftproduksjonen var på same nivå over ei veke var i første kvartal inneverande år. Veka var òg prega av lite tilsig, og samla gav dette ein reduksjon i magasinfyllinga på rundt 2 prosentpoeng i sørlege Noreg.

Høg nettoeksport frå sørlege Noreg
I Noreg auka forbruket like mykje som kraftproduksjonen, og nettoeksporten var omtrent på nivå med veka før. Likevel var det regionale forskjellar, der sørlege Noreg hadde auka eksport til kontinentet, mens Midt-Noreg hadde høgare nettoimport. Sist sørlege Noreg hadde like høg nettoeksport var i veke 49 i fjor. Oppgangen i nettoeksporten frå sørlege Noreg heng saman med eit stabilt høgt prisnivå på kontinentet gjennom veka.

Gassprisar
Gassprisane i Europa steg til rett over 100 EUR/MWh i veke 44, men har den siste veka hatt ein reduksjon på 10-20 prosent. Korleis dette vil verke inn på kraftprisane i Europa og Noreg kan variere mykje frå veke til veke. Verknaden vil avhenge av kor ofte gasskraft er den prissetjande teknologien. Dei norske kraftprisane blir vidare påverka av prisnivået i Europa gjennom mellomlandsforbindelsane, særleg inn til Sørvest-Noreg.

Merknad
Det manglar data for kraftforbruk og kraftproduksjon i Danmark for store delar av veke 45. Desse tala er erstatta med prognosetal. Dette påverkar tal for dansk forbruk, produksjon og utveksling for Norden (tabell 6 og 7, figur 10, 11 og 12). For Figur 14 er ikkje flyttala erstatta med prognosetal, så data på utveksling frå Danmark kan vere mangelfull. Det manglar også temperaturdata for torsdag 29.oktober i figur 8. Desse tala er erstatta med prognosetal.

Last ned kraftsituasjonsrapporten for veke 45 2026

Vassmagasinstatistikk
Les meir om vassmagasinstatistikk her. 

For fleire detaljer, sjå: www.senorge.no/map.