Kraftsituasjonen veke 37, 2026

Lågare vind- og solkraftproduksjon på kontinentet førte til høgare kraftprisar og auka vasskraftproduksjon i sørlege Noreg (NO1, NO2 og NO5) i veke 37. Etter fullført vedlikehald vart samstundes meir utvekslingskapasitet på mellomlandssambanda tilgjengeleg. Til saman førte dette til nettoeksport frå Noreg gjennom veka. Tilsiget for veka var høgare enn vasskraftproduksjonen, noko som gav auka fyllinga i vassmagasina i sørlege Noreg.

Auka magasinfylling trass høgare vasskraftproduksjon
Vasskraftproduksjonen frå magasin auka monaleg i Vest- og Sørvest-Noreg (NO5 og NO2) samanlikna med veka før. Over veka var likevel tilsiget høgare enn vasskraftproduksjonen samla sett for Noreg. Dette bidrog til at fyllingsgraden i vassmagasina gjekk opp i sørlege og Midt-Noreg (NO1, NO2, NO5 og NO3).

Høgare kraftprisar
Dei gjennomsnittlege vekeprisane auka i alle dei norske prisområda, unnateke Midt-Noreg (NO3), der vekeprisen var tilnærma uendra. Sørvest-Noreg (NO2) hadde det høgaste vekesnittet hittil i år. Noko av årsaka til dette var mindre vind- og solkraftproduksjon på kontinentet som bidrog til færre timar med låge prisar på dagtid samanlikna med veka før. I løpet av veke 37 vart også produksjonskapasiteten i nordisk kjernekraft redusert på grunn av planlagt vedlikehald. Ved utgangen av veka var under 50 prosent av installert kapasitet tilgjengeleg. Mindre kraftproduksjon frå fornybare produksjonsteknologiar og kjernekraft vart i nokon timar erstatta av dyrare fossil kraftproduksjon på kontinentet. Dette gav høgare høgpristimar og bidrog til å dra vekesnittet for kraftprisen opp både på kontinentet og sør i Norden.  

Auka gassprisar
Grunna en uroleg geopolitisk situasjon har gassprisane dei siste vekene auka, og er no på det høgaste nivået sidan desember 2022. Ved høg etterspurnad og låg uregulerbar kraftproduksjon på kontinentet, blir gasskraft ofte den prissetjande teknologien. Gassprisen betyr derfor mykje for kraftprisane i Europa og verkar igjen inn på kraftprisane i Noreg gjennom mellomlandssambanda. Med dagens marknadspris for gass og utsleppskvoter (høvesvis ~80 EUR/MWh og ~80 EUR/tonn), vil et gasskraftverk med verknadsgrad på 50 % fort krevje prisar på 200 EUR/MWh (om lag 215 øre/kWh) eller meir for å dekke driftskostnadane.

Kraftprisar (gjennomsnitt for veka):

• Søraust-Noreg (NO1): 148 øre/kWh (+25 øre/kWh frå veke 36)
• Sørvest-Noreg (NO2): 162 øre/kWh (+31 øre/kWh frå veke 36)
• Midt-Noreg (NO3): 111 øre/kWh (+0 øre/kWh frå veke 36)
• Nord-Noreg (NO4): 38 øre/kWh (+8 øre/kWh frå veke 36)
• Vest-Noreg (NO5): 149 øre/kWh (+23 øre/kWh frå veke 36)

Nettoeksport frå Noreg
Etter to veker med nettoimport til Noreg, var det i veke 37 nettoeksport frå Noreg. Høgare kraftprisar og auka etterspurnad etter kraft på kontinentet bidrog til dette. I tillegg var meir utvekslingskapasitet på mellomlandssambanda tilgjengeleg etter fullført vedlikehald, noko som mogleggjorde høgare eksport frå sørlege Noreg til Storbritannia og kontinentet.

NVE varslar rapporteringsordning i Midt-Noreg
NVE har varsla rapporteringsordning for vasskraftprodusentane i Midt-Noreg (NO3) som kan lesast her: NVE varsler rapporteringsordning for vannkraftprodusenter i Midt-Norge - NVE

Last ned kraftsituasjonsrapporten for veke 37 2026

Vassmagasinstatistikk
Les meir om vassmagasinstatistikk her. 

For fleire detaljer, sjå: www.senorge.no/map.