Kraftsituasjonen veke 27, 2026
Høgare vindkraftproduksjon og lågare kraftprisar
NVE arbeider no med å forbetre kraftsituasjonsrapporten
Vil du bidra? Del innspela dine her
På kontinentet var det lågare temperaturar, redusert forbruk og meir vindkraftproduksjon førre veke samanlikna med veka før. Dette bidrog til lågare kraftprisar i store delar av Nord-Europa, mindre norsk vasskraftproduksjon og auka magasinfylling.
Nøkkeltal for veka
Kraftprisar (gjennomsnitt for veka):
- Søraust-Noreg (NO1): 83 øre/kWh (+5 øre/kWh frå veke 26)
- Sørvest-Noreg (NO2): 96 øre/kWh (-25 øre/kWh frå veke 26)
- Midt-Noreg (NO3): 67 øre/kWh (+12 øre/kWh frå veke 26)
- Nord-Noreg (NO4): 26 øre/kWh (-16 øre/kWh frå veke 26)
- Vest-Noreg (NO5): 78 øre/kWh (+22 øre/kWh frå veke 26)
Meir vindkraftproduksjon og lågare kraftprisar
Kraftprisane fall i store delar av Nord-Europa førre veke. Periodar med mykje vindkraft og redusert forbruk bidrog til at det var færre timar med høge prisar og fleire timar med låge prisar på kontinentet. I Tyskland dobla vindkraftproduksjonen seg frå veka før. Saman med lågare forbruk bidrog dette til mindre fossil kraftproduksjon, og vekeprisen i Tyskland gjekk ned med 34 øre/kWh.
Likare prisar i Noreg
Reduserte kraftprisar på kontinentet ga lågare kraftprisar også i Sørvest-Noreg (NO2). Her gjekk kraftprisen ned med 25 øre/kWh, medan han gjekk opp i Midt- og Vest-Noreg (NO3 og NO5). Dette gav likare prisar i Noreg unnateke i Nord-Noreg (NO4) der prisen enda på eit lågare nivå. Ei av årsakene til likare prisar mellom Sørvest- og Vest-Noreg var auka overføringskapasitet mellom områda som følgje av avslutta vedlikehald i nettet. Dette bidrog til at meir kraft kunne flyte mellom områda enn dei føregåande vekene.
Lågare vasskraftproduksjon og auka magasinfylling i Noreg
Lågare kraftprisar i Sørvest-Noreg (NO2) bidrog til lågare vasskraftproduksjon og nettoeksport frå Noreg samanlikna med veka før. Sjølv om tilsiget til alle vasskraftmagasina i Noreg var under historisk gjennomsnitt auka fyllingsgraden i alle dei norske prisområda førre veke.
Merknad
Det manglar temperaturdata for Noreg 24. juni. Verdiane er erstatta med prognosetal.
Last ned kraftsituasjonsrapporten for veke 27 2026
Vassmagasinstatistikk
Les meir om vassmagasinstatistikk her.
For fleire detaljer, sjå: www.senorge.no/map.
