Kraftsituasjonen veke 9, 2026

Kraftprisane gjekk ned i Noreg sist veke. Dette har blant anna samanheng med at kraftprisane nord på kontinentet gjekk ned, og at mildare vêr bidrog til lågare kraftforbruk. Både Noreg og Norden fortset med å importere kraft.

Nøkkeltal for veka
Kraftprisar (gjennomsnitt for veka):

• Søraust-Noreg (NO1): 102 øre/kWh (-16 øre/kWh frå veke 8)
• Sørvest-Noreg (NO2): 100 øre/kWh (-6 øre/kWh frå veke 8)
• Midt-Noreg (NO3): 97 øre/kWh (-7 øre/kWh frå veke 8)
• Nord-Noreg (NO4): 60 øre/kWh (-17 øre/kWh frå veke 8)
• Vest-Noreg (NO5): 102 øre/kWh (-13 øre/kWh frå veke 8)

Fortsett nedgang i vasskraftproduksjonen i sørlege Noreg
Vasskraftproduksjonen i sørlege Noreg (NO1, NO2 og NO5) gjekk ned for andre veka på rad, og Noreg hadde nettoimport av kraft for veka sett under eitt. Totalt i Norden gjekk samla kraftproduksjon ned, blant anna grunna lågare kraftproduksjon frå vind- og kjernekraft.

Kraftprisane i Noreg gjekk ned
Kraftprisane i sørlege Noreg held fram med å følgje prisane i naboland på kontinentet. Dermed medverka ein nedgang i prisnivået her til at sørlege Noreg fekk lågare kraftprisar i veke 9, samanlikna med veka før.

Dei norske kraftprisane vart høgast på tysdag. Då låg prisane i snitt på mellom 150-200 øre/kWh i enkelte timar. Dette var ein periode der vindkraftproduksjonen var låg i store delar av Nord-Europa. Nord på kontinentet var prisane låge midt på dagen i periodar med høg solkraftproduksjon fleire av dagane sist veke. Somme land hadde tidvis negative prisar.

Mildare vêr gav lågare kraftforbruk
Sist veke vart det mildare vêr i store delar av landet. Ved mildare vêr er oppvarmingsbehovet lågare, slik at vêromslaget bidrog til at kraftforbruket gjekk ned i Noreg. Lågare forbruk har truleg også bidrege til prisnedgangen.

Krig i Midtausten
USA og Israel sitt angrep på Iran 28. februar, og påfølgjande konfliktar i Midtausten, har mellom anna ført til at prisen på naturgass auka sterkt i starten av inneverande veke. Verknadane av dette er ikkje synlege i kraftsituasjonsrapporten for veke 9, men det er venta at dei europeiske kraftmarknadane vil bli påverka framover.

Merknad
Produksjonsdata for Danmark held for tida på med å bli oppdaterte hos dataleverandør. Dette inneber at det kan vere feil i figurar og tabellar i rapporten som baserer seg på desse tala.

Last ned kraftsituasjonsrapporten for veke 9 2026

Vassmagasinstatistikk
Les meir om vassmagasinstatistikk her. 

For fleire detaljer, sjå: www.senorge.no/map.