Kraftsituasjonen veke 47, 2025
Auka forbruk ga reduksjon i magasinfyllinga og høgare kraftprisar
I førre veke gjekk magasinfyllinga i Noreg ned i alle prisområda. Hovudårsaka til nedgangen var auka vasskraftproduksjon grunna kaldare vêr og høgare etterspurnad etter kraft. Me må rekna med variasjonar i magasinfyllinga utover vinteren. Me nærmar oss også tida av året der magasinfyllinga normalt reduserast. I denne perioden byrjar nedbøren å komma som snø og tilsiget minkar fram til snøsmeltinga på våren.
Høgare kraftforbruk og kraftproduksjon
Førre veke auka kraftforbruket i heile Norden. Kaldare vêr var den viktigaste årsaka. Meir kraftforbruk bidrog til høgare kraftproduksjon samanlikna med veka før. I Noreg var det hovudsakleg vasskraftproduksjon frå magasin som auka førre veke. Samstundes vart det lite tilsig. Dette førte til at magasinfyllinga i alle prisområda i Noreg gjekk ned.
Likare kraftprisar mellom nord og sør
Det vart høgare kraftprisar i Noreg førre veke. Auken var størst i Midt- og Nord-Noreg (NO3 og NO4) som fekk lengre periodar med prisar på nivå med sørlege Noreg (NO1, NO2 og NO5). Ei av årsakene til dette var mindre vindkraftproduksjon i nordlege delar av Norden (NO3, NO4, SE1, SE2, FI) samanlikna med veka før. I same periode vart det lågare tilgjengelegheit på vasskraft i Nord-Sverige (SE1 og SE2). Årsaka til dette var at fleire vasskraftverk reduserte vassføringa i samband med islegging av elvane. Dette tiltaket vert gjennomført årleg ved inngangen til vinteren. Mindre tilgjengeleg kraftproduksjon og høgare kraftforbruk bidrog til at det vart færre flaskehalsar og likare prisar mellom nord og sør i Noreg.
Gjennomsnittlege kraftprisar for veke 47:
- Søraust-Noreg (NO1): 120 øre/kWh
- Sørvest-Noreg (NO2): 117 øre/kWh
- Midt-Noreg (NO3): 97 øre/kWh
- Nord-Noreg (NO4): 96 øre/kWh
- Vest-Noreg (NO5): 118 øre/kWh
Reduserte prisskilnadar mellom Noreg og kontinentet
Det var òg kaldare vêr og høgare kraftforbruk på kontinentet førre veke. For å dekke forbruket vart det produsert meir frå dyrare termiske kraftverk og kraftprisane gjekk opp sett veka under eitt. Høgare nordisk kraftforbruk bidrog tidvis til lite flaskehalsar i det nordiske nettet, og Noreg og Norden fekk lengre periodar med priskopling mot kontinentet. Dette gjaldt særleg i periodane då det var lite vindkraft og islegging i Nord-Sverige.
Last ned kraftsituasjonsrapporten for veke 47 2025
Vassmagasinstatistikk
Les meir om vassmagasinstatistikk her.
For fleire detaljer, sjå: www.senorge.no/map.
Kraftpriser og kraftsystemdata
NVE lanserer no den første versjonen av «Kraftpriser og kraftsystemdata». Denne nettsida vil presentere utvalde data som blir brukt i kraftsituasjonsrapportar. Nettsida er interaktiv, og brukarar vil ha moglegheit til å tilpasse parametrar som område og tidsperiode. Vi tek gjerne imot tilbakemeldingar som kan bidra til å forbetre rapporten.
