Kraftsituasjonen veke 35, 2025
Mindre vindkraftproduksjon og auka kraftprisar
I førre veke gjekk magasinfyllinga ned i samtlege prisområde i Noreg. Hovudårsaka til nedgangen var lite tilsig. Ein må rekne med variasjonar i magasinfyllinga utover hausten. I eit vêrbasert kraftsystem som det norske er det normalt at ressurssituasjonen i vassmagasina varierer.
Høgare kraftprisar i Norden
I veke 35 auka dei gjennomsnittlege kraftprisane i størstedelen av Norden samanlikna med veka før. Lågare produksjon av vindkraft medverka til prisauken. Dei nordiske prisområda fekk også færre timar med låge kraftprisar midt på dagen. Dette har samanheng med at produksjonen av solkraft på kontinentet minkar på denne tida av året. I Noreg var prisendringane førre veke små, bortsett frå i Vest-Noreg (NO5). Her auka prisane til eit nivå nærare Søraust- og Sørvest-Noreg (NO1 og NO2).
Gjennomsnittlege kraftprisar for veke 35:
- Søraust-Noreg (NO1): 97 øre/kWh
- Sørvest-Noreg (NO2): 100 øre/kWh
- Midt-Noreg (NO3): 13 øre/kWh
- Nord-Noreg (NO4): 4 øre/kWh
- Vest-Noreg (NO5): 79 øre/kWh
Mindre vind ga lågare kraftproduksjon
Samla kraftproduksjon i Norden gjekk ned blant anna grunna lågare vindkraftproduksjon. Samanlikna med veka før, gjekk vindkraftproduksjonen ned med om lag 40 prosent. Lågare kraftproduksjon og tilnærma uendra forbruk ga lågare nettoeksport frå Norden.
Magasinfyllinga gjekk ned i nord
Veke 35 var fyrste gong sidan snøsmeltinga starta i vår at magasinfyllinga i Midt- og Nord-Noreg (NO3 og NO4) gjekk ned. Magasinfyllinga minka fordi tilsiget var lågt, samstundes som vasskraftproduksjonen heldt seg på nivå med veka før. Mot helga auka utvekslingskapasiteten frå Midt- og Nord-Noreg. I same periode vart kraftprisane i Midt-Noreg noko høgare.
Last ned kraftsituasjonsrapporten for veke 35 2025
Vassmagasinstatistikk
Les meir om vassmagasinstatistikk her.
For fleire detaljer, sjå: www.senorge.no/map.
Data for kraftsituasjonen
NVE lanserer no den første versjonen av «Data for kraftsituasjonen». Denne nettsida vil presentere utvalde data som blir brukt i kraftsituasjonsrapportar. Nettsida er interaktiv, og brukarar vil ha moglegheit til å tilpasse parametrar som område og tidsperiode. Vi tek gjerne imot tilbakemeldingar som kan bidra til å forbetre rapporten.
