Kraftsituasjonen veke 2, 2026
Kaldt vêr og rekordhøgt kraftforbruk
Rekordhøgt kraftforbruk i delar av Norden
Kraftforbruket auka i heile Norden i veke 2. Dette heng saman med at fleire stader hadde temperaturar under normalen. I tillegg var det første veka utan heilagdagar etter ferien. Førebelse tal viser at det kalde vêret bidrog til ny forbruksrekord over ei veke i Noreg, Finland og Danmark. Det vart òg sett rekord for timesforbruket; Statnett melde om ny forbruksrekord over ein time i Noreg onsdag morgon.
Høgare kraftprisar
Gjennomsnittlege kraftprisar for veka auka i nesten alle land i Norden og på kontinentet samanlikna med veka før. I starten av veka og fram til fredag var det lite vindkraftproduksjon og tidvis høge kraftprisar som drog opp vekesnittet. Spesielt torsdag var det høge kraftprisar i fleire område. Til dømes fekk Søraust-Noreg (NO1) høgaste kraftpris i Europa på 404 øre/kWh mellom klokka 16:45-17:00 torsdagen.
Gjennomsnittlege kraftprisar for veke 2:
- Søraust-Noreg (NO1): 133 øre/kWh
- Sørvest-Noreg (NO2): 130 øre/kWh
- Midt-Noreg (NO3): 114 øre/kWh
- Nord-Noreg (NO4): 82 øre/kWh
- Vest-Noreg (NO5): 130 øre/kWh
Auka kraftproduksjon og nettoeksport i Noreg
Det var ein auke i den norske kraftproduksjonen frå veka før, og førebelse tal visar at det aldri har vore høgare produksjon i Noreg over ei veke. Vasskraft med magasin sto for den største auken, og det var spesielt i Sørvest- og Vest-Noreg (NO2 og NO5) kor endringa var størst.
Trass rekordhøgt forbruk var det høgare nettoeksport frå Noreg samanlikna med veka før. Ei viktig årsak til dette, var at det gjekk mindre import frå Sør-Sverige (SE3) til Søraust-Noreg (NO1), samstundes som det vart noko meir eksport til Danmark og Tyskland.
Last ned kraftsituasjonsrapporten for veke 2 2026
Vassmagasinstatistikk
Les meir om vassmagasinstatistikk her.
For fleire detaljer, sjå: www.senorge.no/map.
Kraftpriser og kraftsystemdata
NVE lanserer no den første versjonen av «Kraftpriser og kraftsystemdata». Denne nettsida vil presentere utvalde data som blir brukt i kraftsituasjonsrapportar. Nettsida er interaktiv, og brukarar vil ha moglegheit til å tilpasse parametrar som område og tidsperiode. Vi tek gjerne imot tilbakemeldingar som kan bidra til å forbetre rapporten.
