Statnett får byggje Krossdalen transformatorstasjon i Modalen
Noregs vassdrags- og energidirektorat (NVE) har gitt Statnett SF løyve til å byggje ein ny transformatorstasjon i Modalen kommune. Eviny Fornybar får samtidig løyve til å leggje om ein kraftleidning inn til stasjonen. Utbygginga er viktig for straumforsyninga inn mot bergensregionen.
– Det er venta at kraftforbruk i Bergen og omland vil auke, og då er det nødvendig å forsterke transmisjonsnettet i regionen. Dette er utgangspunktet for at Statnett får løyve til å byggje ny transformatorstasjon, seier seksjonssjef Ingrid Myrtveit.
Slik blir det nye anlegget
Krossdalen transformatorstasjon blir bygd inntil dagens Modalen koplingsstasjon, som skal rivast. Det totale inngjerda stasjonsområdet utgjer om lag 26 000 m2. Den største stasjonsbygningen får ei grunnflate på ca. 1 900 m2, og ei høgd rundt 21 meter.
Kraftleidningane til Statnett og Eviny må leggjast om inn til den nye stasjonen. I tillegg får Statnett løyve til å byggje to nye luftleidningar på 420 kV til Steinsland koplingsstasjon og Haugsvær transformatorstasjon. Luftleidningane er på om lag 5 kilometer og skal byggjast i parallell trasé. Den eine luftleidninga skal byggast i traseen til ei leidning som skal rivast.
Statnett får også løyve til å utbetre og byggje ny veg slik at dei kan frakte transformatorar fram til stasjonen.
NVE stiller krav til anleggsarbeidet
– For å minimere verknadene for natur og samfunn må Statnett og Eviny utarbeide ein felles detaljplan som beskriv korleis anleggsarbeidet skal gjennomførast. Vi har også stilt krav til mellom anna plasseringa av master, skånsam skogrydding og omsyn til villrein og hekkande rovfugl, seier Myrtveit.
Det er spreidd fritidsbusetnad i området, og NVE har stilt krav om at Statnett skal varsle i forkant av det mest støyande anleggsarbeidet. Master skal plasserast slik at dei ikkje er til hinder for friluftsliv. Det skal også vere avgrensa skogrydding ved stasjonsområde og i leidningstrasear for å redusere visuelle verknader og verknader for naturmangfaldet. Vidare har NVE stilt krav om at Statnett skal kartleggje og avklare med rette styresmakt om anleggsarbeidet skal tilpassast villreinen og hekkeperioden til rovfugl.
Detaljplanen skal beskrive korleis Statnett skal redusere faren for avrenning til vassdrag, og korleis ny veg og masselager skal tilpassast til landskapet. Detaljplanen skal godkjennast av NVE før anleggsstart.
