Regulering av Djupavatn

Det er gitt løyve til å senke vasstanden i Djupavatn med 1,9 m mellom kote 432,9 som er naturleg vasstand, og kote 431. Reguleringa vil gje ei utjamna vassføring mellom Djupavatnet og Brekkestølvatnet over året. Brekkestøl kraftverk har inntak i Brekkestølvatnet. Det vil verte færre periodar med overløp forbi inntaket til kraftverket sidan ein større del av flaumvatnet kan haldast attende i Djupavatnet.

Nedanfor eksisterande kraftverksinntak er der ei bekkekløft med regional verdi, der det vil kome mindre vatn. NVE meiner dette ikkje er avgjerande negative konsekvensar. Strekninga er også i dag turrlagd delar av året, og det er ikkje påvist radlista artar. Etter NVEs syn er kvalitetane i kløfta i mindre grad avhengig av vassføringa, og det er difor ikkje sett nye krav til det eksisterande kraftverket.

NVE gjev løyve til ei minstevassføring på 115 l/s frå Djupavatnet heile året. Dette er det same som Brekkestørl kraftverk AS har foreslått i sin søknad. Denne minstevassføringa meiner NVE vil oppretthalde vassavhengige artar og noko av elva si verd som landskapselement.

NVE vurderar reguleringa som akseptabel i høve til allmenne og private interesser og gjev difor løyve til regulering av Djupavatnet på fastsette vilkår.