Dagsvikelva kraftverk

Utbygginga vil nytte ei fallhøgd på 139 meter og endre naturleg vassføring i Dagsvikelva på ei ca. 1,5 km lang strekning. Inntaket blir bygd i Dagsvatnet, som skal regulerast med 0,7 meter. I høve til normalvasstanden i Dagsvatnet på kote 203,0, er det planlagt ei oppdemming til kote 203,35 og ei senking til kote 202,65.

Av omsyn til naturmiljø og brukarinteresser er det satt vilkår om at det vert sleppt ei minstevassføring i Dagsvikelva på 180 l/s om sommaren og 50 l/s om vinteren. Det er også satt vilkår om at det må installerast ein omlaupsventil i kraftverket, dette av omsyn til anadrom fisk nedafor kraftstasjonen. Omlaupsventilen skal ha ein kapasitet på 700 l/s eller 40 % av maksimal slukeevne. Samtidig skal trykkrøyr gravast ned på hele strekninga.

Reguleringa i Dagsvatnet vil utjamne vassføringa nedstraums kraftverket i Dagsvikelva til ein viss grad, men NVE meiner det ikkje vil ha særleg stor  verknad for laks og sjøaure. Det vil vera nokre negative verknader som følgje av bygging av røyrgate og annen anleggsverksamd. Samtidig er det ikkje registrert nokon spesielle miljøverdiar i tiltaksområdet. Det er opna for ei best mogeleg tilpassing for landskap og miljø ved NVEs endelege godkjenning av detaljplanen for utbygginga. NVE vurderer at utbygginga saman med avbøtande tiltak som akseptabel i høve til allmenne interesser.