Nye Tussa kraftverk

NVE har fått ein førespurnad frå Tussa Energi AS, datert 29.01.2025, om vurdering av konsesjonsplikt for å byggje Nye Tussa kraftverk. Dagens kraftverk er over 60 år gamalt og står overfor omfattande vedlikehaldsarbeid i tida framover. Tussa Energi AS ønskjer difor å oppgradere eksisterande Tussa kraftverk ved å bygge eit nytt kraftverk (Nye Tussa kraftverk). Tiltaket vil auke installert effekt frå dagens 56 MW til 150 MW. Det er planlagt å halde eksisterande kraftverk i drift inntil vidare. Ifølgje søkjar vil ikkje det nye kraftverket gi endringar i vassføringar i elvestrengar, men start-stopp-køyring kan gi ein endring i magasinfyllingsmønsteret i Tyssevatnet. Høgaste og lågaste regulerte vasstand i vatnet vil ikkje verte endra.

Førespurnaden skal behandlast etter vassdragsreguleringslova § 4 og vurderast etter § 3 i same lov. NVE skal på bakgrunn av førespurnaden vurdere om tiltaket gir skade og ulempe av slik betydning for allmenne interesser at det oppstår konsesjonsplikt etter vassdragsreguleringslova.