Tysso kraftverk - søknad om planendring

NVE har godkjent planendringa

Tysso kraftverk fekk konsesjon av Energidepartementet i 2021. Tysso kraftverk AS har no søkt om å endre delar av den konsesjonsgitte løysinga.

Den viktigaste endringa er at den planlagde nedgravne røyrgata blir erstatta med tunnel heile vegen frå inntaket til kraftstasjonen. Søkjaren skal også byggje kraftstasjonen i fjell i staden for å ta i bruk den tidlegare kraftstasjonen Ulvik I.

NVE meiner at planendringa samla sett gir færre naturinngrep og reduserer behovet for graving i dagen samanlikna med den konsesjonsgitte løysinga. Samstundes kan kraftstasjonen Ulvik I og kulturmiljøet langs Tysso bevarast.

Planendringa fører til inngrep i ein lokalitet med den raudlista naturtypen lågurtalm-lind-hasselskog. NVE vurderer likevel at påverknaden er avgrensa, og at fordelane ved planendringa er større enn ulempene.

Forlengd byggjefrist

For å kunne gjennomføre planendringa søkte Tysso kraftverk AS også om forlenga byggjefrist.

Ved behandlinga av søknaden har NVE vurdert om det har kome fram nye eller endra forhold sidan konsesjonen vart gitt i 2021. NVE kan ikkje sjå at det har kome fram forhold som gir grunnlag for å avslå søknaden.

NVE har difor forlengd byggjefristen for Tysso kraftverk med fem år, til 20. mai 2031.