Uttak av vann og regulering av Kørelen

Fjell og Sund kommunar ligg på Sotra , vest for Bergen. Begge kommunane har aukande folketal. Kørelen har fungert som vasskjelde for Sund kommune sidan 2005. I Fjell kommune sin reviderte hovudplan for vassforsyning av 2011, vart Kørelen planlagt som vasskjelde også for Fjell kommune. Ulempene knytt til dette vassuttaket vil først og fremst vere i form av fysiske inngrep i utløpsosen til Kørelen. Dei fysiske inngrepa er relativt avgrensa og vil berre vere synleg lokalt i landskapet. Nordsjøløypa kryssar i dag utløpsosen med bru. Ved at søkar tek omsyn til denne brua ved gjennomføring av tiltaket, meiner NVE tiltaket vil ha avgrensa verknad for friluftsliv. Med avbøtande tiltak i form av minstevassføring og fisketrapp, meiner NVE at tiltaket er akseptabelt av omsyn til anadrom fisk."