Søknad om senking av vasstand i Kringastemma og riving av deler av dam Kringastemma

For å tilfredstille gjeldande krav til damsikkerheit er dameigar  pålagt omfattande tiltak for å oppnå stabilitet etter gjeldande sikkerheitsforskrift og NVEs retningslinjer for murdammar. Dammen har i dag ingen funksjon bortsett frå dei visuelle kvalitetane vatnet gjev. Dammen er og ein del av gangnettverket i området, men det skal etablerast ei ny gangbru parallelt med riksvegbrua like ved. I samband med utarbeiding av teknisk plan, ynskjer no kommunen i staden for omfattande forsterkningsarbeid på eksisterande dam, å rive delar av dammen, og samstundes senke HRV frå kote 20,07 til kote 18. Vasstanden i Kringastemma vil bli permanent senka med 2 meter.

Søknaden skal handsamast etter reglane i kap. 3 og 7  i vassressurslova og gjeld løyve etter vassressurslova § 41 om løyve til nedlegging av vassdragsanlegg. Kapittel 7 i vassressurslova inneheld reglar om nedlegging av vassdragsanlegg. Dersom ein eigar av vassdragsanlegg ynskjer å leggje ned anlegget skal det gjevast løyve til dette, jf. vassressurslova § 41. Viss nedlegginga kan føre til påtakeleg skade eller ulempe for ålmenne interesser vil det vere nødvendig å stille vilkår til korleis nedlegginga skal gjennomførast.

Søknaden har tidlegare blitt sendt på avgrensa høyring til Fylkesmannen i Hordaland og Hordaland fylkeskommune. Hordaland fylkeskommune har ikkje kome med fråsegn ennå, og vil nå få ein ny moglegheit. NVE ynskjer at fylkeskommunen gjev fråsegn med utgangspunkt i sine  ansvarsområde.

NVE ønskjer mest mogleg konkrete synspunkt på korleis nedlegginga bør gjennomførast og forslag om avbøtande tiltak.  Dersom partane er kjende med tilhøve som det ikkje er opplyst om i tilstrekkelig grad i søknaden, ønskjer NVE opplysningar om dette. Osterøy kommune er søkjar og får høyringsbrevet til orientering.