Trøimsåne kraftverk

Trøimsåne kraftverk var planlagt i elva Trøimsåne, som renn ut i Hemsil i sentrum av Hemsedal kommune. Kraftverket var planlagt med ein installert effekt på 3,8 MW og ville gje ein årleg produksjon på omlag 8,9 GWh. Tilnærma alle høyringspartane har gått imot planane om bygging av kraftverket.

NVE legg stor vekt på konsekvensane tiltaket vil medføre for landskap, friluftsliv og tap av villmarksprega natur. Det er óg registrert ein verdfull naturtype i ei bekkekløft, på store delar av den planlagde utbyggingsstrekninga. Strekninga har sjeldne og fuktkrevjande mose- og lavartar, der tre er registrert i raudlista. Det er vurdert potensial for ytterlegare funn. I avgjersla har NVE lagt vekt på at tiltaket vil kunne føre til store og varige sår i det urøyrde området langs vassdraget. Fråføring av vatn på utbyggingsstrekninga vil også redusere Trøimsånas verdi som lokalt landskapselement.

Bygging av Trøimsåne kraftverk vil etter NVE si oppfatning kome i sterk konflikt med verdiane i området, som etter NVEs meining vert betydeleg påverka gjennom sterkt redusert vassføring og store fysiske inngrep. Dei negative konsekvensane står etter NVE sitt syn ikkje i forhold til auka kraftproduksjon eller andre positive effektar av ei utbygging. NVE vurderer at utbyggingsplanane ikkje er akseptable i høve til allmenne interesser og gir difor ikkje løyve til bygging av Trøimsåne kraftverk.