Moråga kraftverk

Sjøfossen Energi AS har søkt om løyve til å bygge Moråga kraftverk i elva Moråga, eit sidevassdrag til Beiarelva i Beiarn kommune. Kraftverket er planlagt med ein installert effekt på 2,8 MW, og ein årleg produksjon på ca. 8 GWh, noko som svarar til den årlege straumbruken til rundt 400 husstandar. Hovudargumentet for avslaget på søknaden er dei negative verknadene ei utbygging vil ha på landskapet i Beiardalen. Etter NVEs syn utgjer Moråga eit viktig lokalt landskapselement, som har stor verdi for bebuarar og tilreisande til Beiardalen. I tillegg vil ein rørtrasé og anleggsveg medføre terrenginngrep som også har ulempar for landskapet og korleis det blir oppfatta. NVE meiner at dei negative konsekvensane ikkje står i høve til auka kraftproduksjon eller andre positive effektar av ei utbygging. Etter NVEs syn er det heller ikkje moglegheiter for å bøte på verknadene med tiltak, og vurderar at utbyggingsplanane ikkje er akseptable i høve til allmenne interessar, og gir derfor ikkje løyve til bygging av Moråga kraftverk.