Langfjordhamn kraftverk

NVE har i den samla vurderinga lagt særleg vekt på at Langfjordhamn kraftverk vil gje eit bidrag i produksjon av ny, fornybar energi der ein stor del er regulerbar kraft. Dette vil vere med å oppfylle politiske mål om auka satsing på fornybar kraftproduksjon i Noreg.

Utbygginga har verknad på Langfjordelva med inntak i Førstevatn og kraftstasjon med utlaup via ein kort kanal ut i sjøen i Langfjordhamn. Førstevatn vert regulert 10 meter gjennom nedtapping om vinteren.

Dei negative verknadane er i hovudsak knytt til endra landskapsbilete ved redusert vassføring med særleg vekt på fossene i Langfjordelva, samt negative konsekvensar for friluftsliv i bygda og området rundt Førstevatn, reindrift, is på fjorden og sedimenttilførsel til sjøen.

NVE har gjort ei heilskapleg vurdering av søknaden, tilleggsutgreiing av redusert alternativ og dei mottekne høyringsfråsegnene. På bakgrunn av dette tilrår NVE at det vert gjeve løyve til bygging av kraftverket etter alternativ 2 og at minstevassføringa i Langfjordelva vert auka betrakteleg om sommaren. Dette vil etter NVEs syn sikre ei viss vassføring i fossene av omsyn til landskapet. NVE mener at vasstanden i Førstevatn skal haldast innafor dei naturlige svingningene om sommeren av omsyn til friluftsliv og landskap i området rundt reguleringsmagasinet. Med ei tett kontakt med reinbeitedistriktet under detaljplanlegging, bygging og drift av kraftverket, vil reindrifta verte ivareteken på ei god måte.

Etter ei samla vurdering meiner NVE at nytten av tiltaket er større enn dei medrekna ulempene. Bygging av Langfjordhamn kraftverk med avbøtande tiltak og endringar som foreslått vil gje ein årleg produksjon på omlag 16,5 GWh. NVE meiner at kraftproduksjonen og auka forsyningssikkerheit i området der Alta Kraftlag A/L er netteigar, veg opp dei negative konsekvensane tiltaket vil medføre.

Olje- og energidepartementet vil stå for den vidare sakshandsaminga.