Strandåna kraftverk

Ei utbygging etter NVE si anbefaling vil gi ei samla årleg produksjonsauke av fornybar energi på om lag 29 GWh. Dette svarar til straumbruken til rundt 1450 husstandar.

NVE har handsama søknadar om løyve til seks kraftverk i Valldalen i Odda kommune. Sakane sendast som innstilling grunna manglande heimel for Grøno kraftverk, og grunna konflikt med eit Samla plan-prosjekt. Sakane treng felles vurdering ved avgjerd.

Søknadane er handsama samla for at NVE skulle kunne gjere ei heilskapleg vurdering av verknadane av kraftverka. Konfliktnivået i sakane har vore høgt. Sentrale tema har vore omsynet til landskapet, friluftsinteressene med nærleik til Hardangervidda nasjonalpark og villrein. I tillegg har omsynet til den samla belastninga på vassdragsnaturen i Røldal vore sentral.

Holdøla sør og Holdøla nord kraftverk

NVE tilrår at det vert gjeve løyve til bygging av Holdøla sør og Holdøla nord kraftverk. Ulempene knytt til verknader for landskapet som følgje av redusert vassføring, tap av INON og verknader for villrein kan etter NVE si vurdering avbøtast i tilstrekkeleg grad med tiltak.

NVE meiner at eit samla bidrag til ny fornybar kraftproduksjon på om lag 29 GWh/år veg opp for dei negative konsekvensane som tiltaka vil føre med seg.

Strandåna, Grøno, Middalen og Trossov kraftverk

NVE vurderer Strandåna og Trossov kraftverk til å vere i openbar konflikt med OED sine retningsliner for små vasskraftverk. Det gjeld særleg omsynet til fossefallet i Strandåna, konsekvensane for det sårbare høgfjellsområdet for begge prosjekta og mulige verknader for villreinen som følgje av Trossov kraftverk. Vassdraga er og viktig for friluftslivet i området. Ei samla kraftproduksjon på 17,2 GWh/år veg ikkje opp for ulempene for allmenne interesser.

Grøno og Middalen vil gje betydelege og varige terrenginngrep i et område med store verdiar for landskapet og friluftslivet. Valldalen er ein viktig innfallsport til Hardangervidda nasjonalpark, og vil etter NVE si vurdering ikkje vere mulig å oppretthalde verdiane ved en eventuell utbygging.

NVE legg og vekt på at prosjekta ligg innafor eit nasjonalt område for villrein, og meiner at kraftverka vil føre til auka ferdsel og at området vil endre karakter og bruk etter ei utbygging. Desse endringane kan slik NVE ser det få negative verknader for villreinen. NVE meiner vidare at den samla belastninga på vassdragsnaturen i Røldal er høg, og at ein vidare utbygging vil kunne forsterke dei negative verknadane av reguleringsmagasinet i Valldalen. Ei samla kraftproduksjon på 60,8 GWh/år veg ikkje opp for ulempene for allmenne interesser.

Olje- og energidepartementet vil stå for den vidare sakshandsaminga.