Konsešuvdnaproseassat Finnmárkkus
NČE lea ožžon 22 ođđa elfápmobuvttadan-dieđiheami Finnmárkkus ovdal áigemeari mii lei cuoŋománu 22. beaivvi. Geassemánu gaskkamuddui lea mis áigumuš ráhkadit vuoruhuvvon listtu dieđihemiin mat sáddejuvvojit gulaskuddamii, ja dasto sáddet dáid gulaskuddamii árračavčča 2024. Oasit dieđihemiin jorgaluvvojit davvisámegillii.
NČE lei bidjan áigemeari cuoŋománu 22. beaivái 2024 dieđihit ođđa plánejuvvon elfápmobuvttademiid Finnmárkkus. Go áigemearri dievai, de leimmet ožžon 22 dieđiheami, oktiibuot 10 suohkanis. Oppalaš listu buot dieđihemiin maid NČE lea ožžon gávnnat min neahttasiiddus.
Prošeavttaid vuoruheapmi
Ráddjejuvvon neahttakapasitehta geažil lea vejolaš čađahit dušše moadde dain prošeavttain mat dál leat dieđihuvvon. NČE geahččala geahpedit prošeavttaid logu ovdal go dat sáddejuvvojit gulaskuddamii. Dán vuoruheami mii dahkat ovttasbarggus guoskevaš suohkaniiguin. Eavttut mat biddjojuvvojit vuođđun leat ee.:
- Ahte doaibma heive oktii suohkaniid plánagieđahallamiin, mii čađahuvvo miessemánus ja geassemánus
-
Ahte doaibma heive oktii Finnmárkku fylkkagieldda regionála plánain bieggafámu birra ja eará dieđuiguin mat gávdnojit oktan guoskevaš areálaárvvoštallamiiguin, ovdamearkka dihte máhttovuođuin mii ráhkaduvvui nationála bieggafápmorámma hárrái
- Duođaštus ahte boazodoallu lea mielde váikkuheame
- NČE oppalaš vuoruhaneavttut konsešuvdnameannudemiid oktavuođas, ja dasto vel suodjalanberoštumiid ja fápmovuogádaga vuhtiiváldin
Plánejuvvon bargu ovddasguvlui
NČE vuolggasadji lea ráđđehusa mihttomearri oažžut ođđa fápmobuvttadeami nehttii ovdal jagi 2030. Cuoŋománus 2024 oaidnit čuovvovaš muttuid ovddasguvlui:
- 2024 giđa: NVE dárkkista ja vuoruha daid dieđihemiid mat leat boahtán sisa, ovttasbarggus guoskevaš suohkaniiguin. Áigeguovdilis dieđihemiid listu lea gárvvis viidáset gulaskuddamii gaskamuttus geassemánu.
- 2024 čavčča: NČE sádde áigeguovdilis dieđihemiid gulaskuddamii árračavčča 2024, mas gulaskuddanáigemearri lea dálvet 24/25.
- 24/25 dálvvi: NČE mearrida čielggadanprográmma ja bidjá áigemeari ohcamiid sáddemii.
- 2025: Doaibmaálggaheaddjit čađahit čielggademiid ja ráhkadit ohcamušaid.
- 2026: NVE pláne sáddet ohcamiid gulaskuddamii.
- 2027: NVE dahká mearrádusa konsešuvnna hárrái.
Mii fuomášuhttit ahte leat ollu bealit mat sáhttet váikkuhit stuora áššiid konsešuvdnameannudeami ovdáneapmái, ja ahte áigeplána sáhttá rievdat.
Sámegiel jorgaleamit
NČE bivdá ahte oasit dieđáhusain mat galget sáddejuvvot gulaskuddamii, jorgaluvvojit davvisámegillii. Gáibádus guoská čoahkkáigessui, ja kapihttaliidda boazodoalu ja eará sámi beroštumiid birra. Mii sihtat maid kárttaid main leat báikenamat sámegillii.