Kva er Noregspris?
Noregspris er ei ny, statleg ordning som gir deg ein føreseieleg straumpris gjennom året. Ordninga er frivillig og gjeld frå 1. oktober 2025.
Lønner Noregspris seg for meg?
Det som er lønnsamt for eitt hushald, er ikkje nødvendigvis lønnsamt for eit anna. Det kjem både an på korleis du bruker straumen over tid, og kvar i landet du bur.
Den noverande straumstøtteordninga gir god forsikring mot dei høgaste prisane, men ønskjer du meir føreseielege kostnader, er Noregspris eit alternativ. Her får du meir rettleiing om kva du bør tenkje på om du vurderer å bestille Noregspris (lenkje på setning).
Kva er forbrukstaket for Noregspris?
Noregspris gjeld for straumforbruk opptil ei maksgrense per månad:
- Hushald: 5 000 kWh per månad per straummålar
- Fritidsbustader: 1 000 kWh per månad per straummålar
Ordninga støttar ikkje straumforbruk over forbrukstaket. Forbruk over desse maksgrensene blir fakturerte til straumprisen avtalt med straumleverandøren din.
Kva risikerer du ved å velje Noregspris?
Blir spotprisen lågare enn Noregspris gjennom avtaleperioden, kan du ende opp med å betale meir enn du ville gjort utan Noregspris.
Kva skjer når spotprisen er lågare enn 50 øre/kWh (med mva.)?
Har du Noregspris, betaler du ein fast pris på 50 øre/kWh (med mva.) uansett kva spotprisen er. Det betyr at det er du som dekkjer differansen (forskjellen) mellom spotprisen og Noregsprisen. Kjem spotprisane gjennom månaden under Noregsprisen, må du betale inn denne differansen til nettselskapet ditt.
Kva skjer når spotprisen er høgare enn 50 øre/kWh (med mva.)?
Har du Noregspris, betaler du ein fast pris på 50 øre/kWh (med mva.) uansett kva spotprisen er. Det betyr at staten dekkjer differansen (forskjellen) mellom spotprisen og Noregsprisen. Blir spotprisane gjennom månaden høgare enn Noregsprisen, trekkjer nettselskapet frå beløpet på nettleigefakturaen din.
Må eg byte straumleverandør?
Nei, du treng ikkje å byte straumleverandør. Du må også framleis ha ein straumavtale med ein straumleverandør sjølv om du bestiller Noregspris. På strompris.no kan du samanlikne straumavtalar og finne ein avtale som passar for deg.
Inkluderer Noregspris påslag til straumleverandøren min?
Nei, du må likevel betale påslag til straumleverandøren din. Påslag vil variere etter kva straumavtale du har. I tillegg må du betale nettleige og avgifter til staten. Det betyr at den totale kostnaden på fakturaen din blir høgare enn 50 øre/kWh (med mva.).
Korleis bestiller eg?
Du kan bestille Noregspris hos nettselskapet ditt eller på minside.elhub.no. Kan du ikkje bestille digitalt, kontaktar du nettselskapet ditt.
Kan eg avbestille Noregspris?
Du har 14 dagars avbestillingsfrist frå du bestiller. Legg merke til at retten til Noregspris fell bort for dagane som går før du avbestiller. Når avbestillingsfristen har gått ut, er straummålaren din bunden til Noregspris ut avtaleperioden (fram til 31. desember 2026).
Du avbestiller Noregspris hos nettselskapet ditt eller på minside.elhub.no. Kan du ikkje avbestille digitalt, må du fylle ut og sende eit avbestillingsskjema til nettselskapet ditt i posten. Avbestillingsskjemaet får du når du bestiller Noregspris. Merk at avbestillinga må poststemplast innan 14 dagar frå datoen bestillinga vart poststempla.
Kva må eg tenkje på om eg ikkje har BankID?
Du må kontakte nettselskapet ditt for å bestille Noregspris.
Du avbestiller Noregspris ved å fylle ut og sende eit avbestillingsskjema til nettselskapet ditt i posten. Avbestillingsskjemaet får du når du bestiller Noregspris. Merk at avbestillinga må poststemplast innan 14 dagar frå bestillinga av Noregspris vart poststempla.
Kor lenge varer Noregspris?
Når du bestiller Noregspris, gjeld det ei bindingstid frå den datoen du bestiller, og fram til den 31. desember 2026. Du må aktivt bestille Noregspris på nytt dersom du vil halde fram med Noregspris etter dette. Stortinget har vedteke at ordninga med Noregspris skal gjelde fram til 31. desember 2029.
Kva skjer om eg ikkje gjer noko?
Du får automatisk den vanlege straumstøtta dersom du har denne i dag.
Kan eg ha både Noregspris og straumstøtte på den same straummålaren?
Du kan ikkje ha både Noregspris og straumstøtte på den same straummålaren. Dersom du vel Noregspris, mistar du retten til straumstøtte på denne straummålaren i avtaleperioden.
Kan eg få straumstøtte på hytta dersom eg ikkje vel Noregspris?
Nei. Straumstøtteordninga gjeld berre for hushaldsforbruk. For fritidsbustader er Noregspris det einaste alternativet.
Kan eg ha Noregspris både heime og på hytta?
Ja, det er mogleg å ha Noregspris på begge eigedommane så lenge dei er registrerte som hushald eller fritidsbustad.
Kan eg ha Noregspris på hytta og straumstøtte heime?
Ja, du kan ha Noregspris på hytta, men straumstøtte heime. Du kan også ha Noregspris både på hytta og heime. Merk at straumstøtteordninga ikkje gjeld for fritidsbustader.
Kva skjer ved flytting eller dødsfall?
Noregspris følgjer straummålaren, ikkje personen som har bestilt avtalen. Dersom ein bustad eller fritidsbustad med Noregspris byter eigar eller leigetakar, vil bustaden framleis vere bunden til Noregspris ut bindingstida. Dette gjeld også ved dødsfall. Dersom det ikkje allereie er registrert Noregspris på den nye bustaden eller fritidsbustaden, må du bestille Noregspris dersom du ønskjer dette.
Må Noregspris bestillast på vegner av bustadselskapet, eller kan kvar bebuar bestille for sitt eige husvære?
Noregspris må bestillast for kvar straummålar. Styret kan bestille Noregspris for fellesareal, medan bebuarane sjølve kan bestille for sitt eige husvære.
Kven kontaktar eg ved spørsmål om ordninga?
Har du spørsmål om Noregspris, må du kontakte nettselskapet ditt. Dersom du og nettselskapet ditt er usamde om du har rett til Noregspris, kan du klage til Reguleringsmyndigheita for energi i NVE (RME) (lenkje til kontaktskjema).
Gjeld Noregspris for bedrifter?
Nei. Ordninga gjeld berre straumforbruk i bustader og fritidsbustader tilhøyrande eit hushald. Næringsverksemd er ikkje omfatta av ordninga.
Kan eg velje Noregspris om delar av bustaden min blir brukte som butikk, kontor osb.?
Dersom delar av bustaden din blir brukte til næringsverksemd, kan dette verke inn på om du har rett på Noregspris eller ikkje. Er meir enn 50 % av straumforbruket ditt hushaldsforbruk, skal du kunne velje Noregspris. Er meir enn 50 % av straumforbruket næringsforbruk, har du ikkje rett til å inngå avtale om Noregspris.
Kva konsekvensar får det om eg har Noregspris utan å ha rett på det?
Dersom du urettmessig har inngått avtale om Noregspris eller har fått feil prissikringsbeløp, kan du få krav om tilbakebetaling frå nettselskapet ditt. Reguleringsmyndigheita for energi krevje at du betaler tilbake beløpet du ikkje hadde rett på.
Kva må eg tenkje på om eg både produserer og forbruker straum?
Noregspris gjeld berre straumen du bruker, og ikkje straumen du sel. Du vil framleis få betalt spotpris for den produksjonen du sel, i tråd med den avtalen du har med straumleverandøren din. Kjem spotprisen under 50 øre/kWh, kan det vere gunstig at eigenproduksjonen din blir brukt til å dekkje eige forbruk i staden for at du sel straumen.
Lønner det seg å spare på straumen?
Straumsparing og energieffektivisering sluttar ikkje å vere viktige både for naturen og straumrekninga di. Sparer du på straumen, bidreg du til å redusere og utsetje behovet for å byggje ut straumnettet. Å byggje ut nettet meir er både dyrt og fører ofte til naturinngrep. Samtidig kan du få lågare nettleige om du minskar forbruket ditt, uavhengig av om du vel Noregspris eller held fram med den noverande straumstøtteordninga. Til slutt: Det lønner seg alltid å spreie straumforbruket utover dagen og unngå å bruke mange straumkrevjande apparat samtidig.