Bustadselskap er burettslag, bustadaksjeselskap, eigarseksjonssameige og ikkje-seksjonerte sameige.
Bustadselskap har rett til å inngå avtale om Noregspris for felles forbruk i bustadselskapet. Felles forbruk kan til dømes vere straum til varmvatn, vaskekjellar, oppvarming av fellesområde, garasjeanlegg, heis og lading av elbilar for bebuarar.
I bustadselskap der bebuarane har individuelle målarar, må bebuarane sjølve inngå eigne avtalar om Noregspris. Er det berre éin straummålar for heile bygget, kan ikkje bebuarane ha individuelle avtalar om Noregspris. Då er det styreleiaren i bustadselskapet som inngår avtale på vegner av alle bueiningane.
Skal bustadselskapet velje Noregspris?
Formålet med Noregspris er å sikre føreseielege straumutgifter. Styret i bustadselskapet bør få ei oversikt over talet på straummålarar i bustadselskapet og kva straumen går til. Det kan til dømes vere forskjell på kor lønnsamt Noregspris er for ein straummålar som går til oppvarming av fellesareal, og ein straummålar som går til elbillading. Mange kan tilpasse elbilladinga slik at det er lett å lade når straumprisen er låg. Hugs også at nettleigekostnaden blir påverka av kor mykje straum som blir brukt samtidig, og når på døgnet straumen blir brukt.
Det er ei eiga ordning for Noregspris for fjernvarme, som du kan lese om her.
Korleis bestille Noregspris?
Bustadselskapet kan bestille Noregspris på minside.elhub.no. Merk at bestillinga må gjerast for kvar straummålar. Får ikkje styreleiaren tilgang til å bestille Noregspris via Elhub, må hen kontakte nettselskapet.
Styret må kontrollere at bustadselskapet får rett prissikringsbeløp
Det er styret som har ansvaret for å kontrollere at bustadselskapet får rett prissikringsbeløp (lenkje til omgrepsliste). Bustadselskapet må sørgje for at utbetalt og innbetalt prissikringsbeløp blir fordelt på hushalda og/eller fritidsbustadene til bustadselskapet.
Styret må rapportere til nettselskapet
- viss meir enn 20 prosent av det oppvarma arealet blir brukt av andre enn dei hushalda/fritidsbustadene som høyrer til bustadselskapet (til næringsformål)
- viss det samla fellesforbruket er høgare enn 5 000 kWh per bueining per månad (1 000 kWh for fritidsbustadforbruk). Det individuelle forbruket til bueiningane kjem i tillegg.
Bustadselskapet skal rapportere til nettselskapet utan ugrunna opphald. Nettselskapet justerer prissikringsbeløpet i tråd med eventuelle innrapporteringar.
Nektar bustadselskapet å levere ut informasjon, eller har det fått for mykje utbetalt, kan Reguleringsmyndigheita for energi i NVE (RME) krevje tilbakebetaling eller stanse utbetalinga. RME kan også krevje at bustadselskapet leverer ut informasjon som er relevant for å vurdere om det er utbetalt for mykje.