- Elhub: Elhub er det sentrale IT-systemet i kraftbransjen for å distribuere måleverdiar og behandle marknadsprosessar. Det er Elhub som har utvikla bestillingsløysinga for Noregspris.
- Forbrukstak: Noregspris gjeld for straumforbruk opp til ei maksgrense i kWh per månad. Straumforbruk over denne maksgrensa blir ikkje omfatta av ordninga og blir fakturert i samsvar med straumavtalen din.
- Gjennomfakturering er når du får éin samla faktura for både straum og nettleige.
- Nettleige er beløpet du betaler til nettselskapet for å få straumen transportert heim til deg. Nettleiga dekkjer drift, vedlikehald og utbygging av straumnettet.
- Nettselskap: Nettselskapet eig og held straumnettet ved like. Du betaler nettleige til nettselskapet for å få straumen levert heim til deg. Det er nettselskapet som er avtalepart for Noregspris.
- Prisområde (bodområde): Noreg er delt inn i fem prisområde: Austlandet (NO1), Sørlandet (NO2), Midt-Noreg (NO3), Nord-Noreg (NO4) og Vestlandet (NO5). Straumprisen blir sett for kvart prisområde, og derfor kan det vere prisforskjellar mellom dei. Legg merke til at kundar i delar av NO4 (Nordland, Troms og Finnmark) er fritekne frå å betale meirverdiavgift (mva.) på straum. Noregspris er derfor utan mva. i desse områda. Er du usikker på kva prisområde du tilhøyrer, kan du kontakte nettselskapet ditt.
- Prissikringsbeløp: Prissikringsbeløpet er differansen (forskjellen) mellom spotprisen per time i bodområdet til kunden og referanseprisen, gonga med det avrekna forbruket til nettkunden. (Sjå definisjonen av referansepris.)
- Påslag er eit tillegg straumleverandøren legg på straumrekninga. Du må framleis betale påslag til straumleverandøren din sjølv om du vel Noregspris. Storleiken på påslaget varierer etter kva straumavtale du har med straumleverandøren din.
- Referansepris: Referanseprisen er i perioden frå den 1. oktober 2025 til den 31. desember 2026 på 50 øre/kWh med mva. (40 øre/kWh utan mva.).
- Reguleringsmyndigheita for energi (RME) er den norske styresmakta som regulerer kraftmarknaden og nettsystemet. RME skal sikre ein effektiv og samfunnsøkonomisk optimal produksjon, overføring og bruk av elektrisk kraft og dessutan regulere naturgassanlegga. Dei fører tilsyn med nettselskapa, fastset reglane for nettilknyting og nettleige og jobbar for ein velfungerande nordisk og europeisk kraftmarknad.
- Spotpris er marknadsprisen på straum som varierer frå time til time, basert på tilbod og etterspurnad i kraftmarknaden. Med Noregspris betaler du ikkje spotpris, men ein fast pris per kWh opp til forbrukstaket.
- Straumavtale er ein avtale om leveringa av straum mellom ein straumleverandør og ein kunde. Du må ha ein straumavtale sjølv om du vel Noregspris.
- Straumleverandør er selskapet du kjøper straum frå. Har du gjennomfakturering (sjå definisjonen av gjennomfakturering), kan du sjå Noregspris på éin samla faktura for straum og nettleige (sjå definisjonen av nettleige).
- Straummålar: Dette er det same som målepunkt. Det er eininga der du les av straumforbruket ditt. Straummålaren finn du som regel i sikringsskapet.