Samanlikning av straumstøtteordninga og Noregspris
|
Straumstøtteordninga |
Noregspris |
|
Staten dekkjer 90 % av kostnaden over 93,75 øre/kWh med mva. (75 øre/kWh utan mva.). |
Du betaler Noregspris på 50 øre per kWh med mva. (40 øre utan mva.). |
|
Du får automatisk straumstøtte dersom du ikkje aktivt vel Noregspris. |
Krev at du aktivt bestiller Noregspris. Du har 14 dagars avbestillingsrett |
|
Inga bindingstid |
Bindingstid. Straummålaren blir låst til Noregspris ut bindingstida (dvs. ut 31. desember 2026). |
|
Straumstøtta gjeld berre bustader. |
Noregspris gjeld for bustader og fritidsbustader. |
|
Forbrukstak på 5 000 kWh/månad |
Forbrukstak på 5 000 kWh/månad for bustader og 1 000 kWh/månad for fritidsbustader |
|
Krev straumavtale med straumleverandør, akkurat som i dag |
Krev straumavtale med straumleverandør, akkurat som i dag |
Dette må du vite før du vurderer:
Ver obs på at det er vanskeleg å spå kva dei framtidige straumprisane blir. Derfor er det ikkje mogleg å seie heilt sikkert om Noregspris lønner seg for deg. Dette er berre ei rettleiing og hjelp til å vurdere om du bør velje Noregspris. Dette er ikkje ein fasit.
Vel du Noregspris, får du ein føreseieleg straumpris gjennom heile året. Ordninga gir deg ein fast pris per kWh for straumforbruket ditt – også om straumprisane er lågare i straummarknaden. Den noverande straumstøtteordninga er ei forsikring mot dei høgaste straumprisane, og straumprisen vil elles variere med svingingane i straumprisane.
Før du vel Noregspris, bør du tenkje på:
- Kvar i Noreg bustaden/fritidsbustaden er. Vi har fem prisområde (bodområde) for straum i Noreg. Det kan vere stor forskjell mellom prisane i dei ulike områda. Til dømes har spotprisen dei siste åra vore langt høgare i NO2 (Sørlandet) enn i NO4 (Nord-Noreg).
- Korleis straumforbruket ditt varierer gjennom året. Då bør du tenkje på når på året du har størst forbruk. Straumprisen er typisk høgare i vinterhalvåret enn i sommarhalvåret.
- At du kan logge deg inn på minside.elhub.no for å sjå korleis Noregspris ville ha påverka straumrekninga di for tidlegare år
- At straummålaren blir låst til Noregspris ut bindingstida som går til 31. desember 2026
- At blir spotprisen lågare enn Noregsprisen i bindingstida, kan du ende opp med å betale meir enn utan Noregspris
- At skal du flytte, må du vere klar over at Noregspris er bunden til straummålaren din og ikkje deg som person
- Om det er ein fritidsbustad. Klikk her for å lese meir om kva du bør tenkje på